Anueit dormí mas menos bien. Ahier, torné a dar-li vueltas a lo de qué luengas bantu aprender y dentré en otro bucle. A’l final decidié empecipiar con lo fang.

Por ixo hoi he estudiau una miqueta de fang, mezclando los recursos que he de Guinea Ecuatorial, Gabón y Camerún, anque lo dialecto que quiero aprender ye lo ntumu porque se charra tanto en Guinea Ecuatorial como en Gabón.

He iu ta lo chimnasio y he entrenau tren superior. Cavilando mientras descansaba entre serie y serie, me s’ha ocurriu que alcaso sería millor empecipiar con lo kituba o con lo suahili. He trobau que bi ha libros de texto de suahili que se pueden mercar en formato ebook, allora dimpués de rematar Assimil bi’n ha muitismo material pa estudiar. Pero agora que he trobau un profe de kituba, me parez millor idea estudiar kituba, tamien porque lo material que’n tiengo ye finito. A’l plegar ta casa he probau la primera lección de FSI, y anque la pronunciación no siga muit complicada, ye menester charrar con la boca zarrada y no articular muito los soníus… Y no sé si ye una cosa intrínsecament autista, pero he ignorau la palabra pa dicir «plátano» porque no mincho fruta y nunca no charraré d’ixe tema.

Y dimpués de dar-li mas vueltas, he decidiu aguardar pa decidir qué otras luengas bantu aprender. Ya cuan haya estudiau una mica de kituba, de fang y de suahili veigo si las mías preferencias han cambiau y tomo la decisión. Por agora bellos candidatos son sena, chiluba, kirundi, kimbundu, sepedi y suazi.

Por fin he podiu solucionar lo problema con lo paquete d’Inpost/Wallapop. M’ha tocau charrar con un chatbot y insistir muito.